Euze Vors Cyrille LXXV woort gebore in 1982 in ’t hospitaol vaan St.-Annadal, es zoon vaan Lou Depondt en Marion van Golde. Dat gebäörde op 11 augustus, dus aon dat nómmer èlf kóste veer al hiel vreug zien tot hei ‘ne echte Vastelaovendsvierder gebore woort. De ierste Vastelaovend maakde heer same mèt zien awwers en zösterke Nadine al mèt in fibberwarie. Koelek ’n haaf jaor aajd, keek heer al mèt Vorsteleke ouge touw vaanoet ’n kojts die vakkundeg oonder ‘ne stehtisch in ’t Brand Beer Hoes woort gepositioneerd. Venaof dat momint voolt e pläötske aon ‘ne stehtisch al aon wie ‘ne natuurleken habitat.

Euzen Hoeglöstegheid greujde op in Eijsde, zègk mer, Mestreech-Oos-Zuid, meh verhuisde al gaw nao Sjaan, boe heer de basissjaol aofmaakde. In 1994 góng heer nao ’t Jeanne d’Arc College aon d’n Awwe Meuleweeg, en nao de middelbare góng heer nao de HEAO in Sittard, boe heer zie dipoma Commerciële Economie haolde. Heer had toen nog steeds neet genóg vaan liere, en haolde International Business in 2008. Um nog mer te zwiege euver ’n haaf jäörke studere in Alabama in Amerika. There he spoke some royal words over the border, and that English bleak a little piece of cake for His High Lustishship.

Boe geer euze Hoeglöstegheid nog mie vaan kint kinne, is zien carrière es bringer, sjinker, klinker en drinker vaan diverse vloeibare versnaperinge in Sjinkerij de Bóbbel in de Wolfstraot. Menneg eurke heet heer hei tösse 1999 en 2009 mage versliete; in zoe’ne kaffee zaot zeker meziek.

In 2009 heet heer zien Eveline liere kinne, in de Clinique in de Platielstraot. Zie waor ouch op slaag verleef op euzen Hoeglöstegheid, en in 2009 gónge zie samewoene aon de Atletebaon neve de Geusselt. Eveline woort gebore in 1986, in Remunj, zègk mer, Mestreech-Oos-Noord. Later zouw ’t köppelke nog via ‘ne tössestop in Vroendaal ziech goon vestege in Amby, boe de Vorsteleke rizzedentie noe gelege is.

In 2016 woort op 11 juni, weer ’t getal èlf, hun döchterke Fien gebore, en in 2019 kreeg euzen Hoeglöstegheid op 11 augustus e magnefiek verjaordagskedoke, hun döchterke Marie. ’t Kin gei touwval zien tot e blauw-zèlver sjienselke toen al riechting euzen Hoeglöstegheid begós te sjijne.

Euze Vors is wèrkzaam gewees bij diverse bedrieve in Limbörg en umgeving, boebij heer ’t oondernummersjap deep in zien haorvate heet zitte. In 2014 kreeg heer ‘nen award es Meest Veelbelovende Starter, zjus wie heer ouch vendaog väölbelaovend maag goon starte. Op dit momint  is heer directeur Kwaliteitszörg vaan Kebony, e Noors bedrief in premium houte producte. Ouch al is me in Noorwegen geweend aon vors, ‘ne Vors es dee vaan us höbbe ze dao nog noets gezeen.

In ziene vrijen tied is euze Vors ‘ne leefhöbber vaan voetbal. In zien jäög voetbalde heer al bij Eijsden en Sjaan, boebij zien speciaoliteit neet zaot in hel traine, väöl gools make of de zjuste bal op de zjuste plek geve, meh heer wel ‘ne groeten aonlègk bleek te höbbe veur ’t dooreinrenne vaan de loch. Es ’t mer renne achter ‘ne bal waor, daan waor heer in en op zien nöpkes. Nao MVV goon loere waor daan ouch edere kier bezunder. Ouch muzikaol steit euze Vors zie menneke. Es gitaris wis heer mèt ziene band menneg hart gawwer te laote kloppe, en ’t rippetere waor eders kier e fieske op ziech.

Vaan 2015 tot 2023 waor heer lid vaan de Ronde Taofel 174. Vaan dao-oet heelp heer mèt mèt de organisatie vaan d’n Duck Race in ’t Stadspark. De koumende weke zal heer ziech veule wie ’n eend in ’t water.

De Vastelaovend steit veur de deur. Euzen Hoeglöstegheid steit gereid um us veur te mage goon in de Vastelaovend vaan Keemelstad. ’t Vorstelek Pelies is gelege aon ’t Tiendschuurpad nómmer 1 in Amby, vlakbij de Rothemse grens. Euze Vors steit in de Börgerleke Stand ingesjreve es

Cyrille Yvon Johannes Depondt

 en zal euver ’t Keemelriek goon regere oonder de vorsteleke naome:

* CITHARAELOGICUS * NOVEGIARIMERCATOR * CIRCUMMENSAMINUS *

* ZYTHODONATORIS *

GEDISSIDEERD EN GECÓNTRASIGNEERD TE MESTREECH-OOS EN VEURGELEZE IN DE BOETELOCH IN ’T BIJZIEN VAAN ’T VOLK VAAN WIEK EN MESTREECH-OOS OP 21 JANNEWARIE, D’N DERDE ZOONDAG VEUR DE VASTELAOVEND, VAAN ’T JAOR 183 KIER 11 PLUS NOG ‘NE KIER 11.

DE KANSELARIJRAOD:

WINO VAN DEN BOSCH * ED MOENEN * RICHARD DARDING * EGIDIUS CRATSBORN