Euze Vors Alain LXXIV woort gebore, 5 x 11 jaor geleie op 17 juli, es zoon vaan Jan en Ria Rutten, in ’t hospitaol Annadal, boenao heer drek naor hoes moch nao de Toongerseweeg in Wolder. ‘t Waor ‘ne supersjoenen zomersen daag boe-op de vastelaovend al in de loch zaot.  Drei jaor later kaom dao zie breurke Stephan bij, en ’t gezinneke waor compleet.

In Wolder is heer opgegreujd, es koejong góng heer nao basissjaol Pie en Pow, um vaan daoroet de euverstap te make nao de toenmaolege Broeders aon de Toongerseweeg. Dat höbbe die broeders gewete. Heer voont ’t sjiek um avventouw bij de Kollefit vaan de broeders get pleetjes te drejje, en is vaan daoroet met ’n vrund zien ‘Drive Inn Show – Disco Action’ begonne.  Es trouw lid vaan de scouting vaan Wolder wis heer daan ouch es disc-jockey eeder jaor weer de dansvloer te vullen. Apropos, de scouting; bijkoumd groet gelök is ouch tot heer op ein vaan de zomerkampe aon de Franse kös verleef is gewore op zien groete leefde Monique.

Via de MTS aon de Bemelergrubbe koum heer in Sittard terech, boe heer ziech specialiseerde in datacommunicatie. Heer góng aon ’t werk in de contreie vaan Mestreech, en doog missiewerk in oonder aandere Gronsveld, Geleen, Sustere, Valkenswaard, Remunj en Venlo. Groninge waor häöm evels te wied. ’t Blood kröp jummers neet boe ‘ne Mestreechteneer neet heen wèl.

In 2000 woort zien dochter Zjulie gebore, en in 2003 ziene zoon Twan. In deen tied woort heer samen met Monique lid vaan Zate Hermenie Blamaasj boe zie geluid oet de tromput en de tuba probeerde te kriege. Boos tónge bewere tot dat wèl neet mèt noete gebäörde, meh mèt nómmerkes. Laot ’t de Wieker Fanfaar meh neet hure.

Ouch is heer bekind es kemediant vaan kemedievereineging ‘Vaan 8 tot 11’, de veurluiper vaan de Zeuten Inval, en de Radlers. En ederein dee al ‘ns heet mètgezoonge en bewoge  mèt ‘En iech spring, spring, spring wie ‘ne sprinkhaon’ wèt tot me vaan dat leefdsje neet allein ‘ne heise stroot krijg, meh ouch spierpijn op plaotse boevaan me neet wis tot me die had. Mèt Supersjoenen Daag heet ‘r ’t zelfs tot de Zoepkoel, en André Rieu gezwomme en gesproonge.

Tot euze Vors neet stèl kint zitte, bliekent ouch wel tot heer, nao allerlei wèrkervaring te höbbe opgedoon, adviseur woort vaan computerprogramma’s en aander softwareprobleme. Mèt aander wäörd: es de kloomel ’t neet deit, neet lang helle, meh euze Vors belle.

En euze Vors maag veurzitter zien vaan eus eige Wieker Fanfaar, die in 2022 hun 75-jaor zjubilei höbbe gevier. ’t Is ’n ier tot heer bij dees importante taak vaan Vors vaan de Keemeleers neet allein veur de fanfaar oet maag loupe, meh ouch drachteraon.

De Vastelaovend heet altied ‘n speciaol plaots in ‘t hart gehad vaan euze Vors gehad. Iers es Pino in de kinderoptocht, denao met zien soms get dissonant gestömde trompöt, en de letste jaore bovenal väöl plezeer make en same mèt Monique pas nao hoes goon es alle lempkes oet zien, of alweer aon.

Euze Vors woent same mèt zien Monique, Zjulie en Twan in ’t Vorstelek pelies, gelege aon de Menthabeemd 12, in Heugem en steit bij de börgerleke stand ingesjreve es:

Allardus Josephus Maria Wilhelmus Rutten

 en zal euver ’t Keemelriek goon regere oonder de vorsteleke naome:

*COMPUTATROLOGICUS *PRAESIDENTICUS *AEDIFICATOR *ARVICOLA

gedissideerd en gecóntrasigneerd te Mestreech-Oos en veurgeleze in de boeteloch in ’t bijzien vaan ’t Volk vaan Wiek en Mestreech-Oos op 29 JANNEWARIE, d’n derde zoondag veur de vastelaovend, vaan ’t jaor 183 kier 11 plus TIEN!

De Kanselarijraod:

Wino van den Bosch * Ed Moenen * Richard Darding * Egidius Cratsborn