Veurleesbook Vastelaovendsvrundsjes

Dao is niks zoe leuk um mèt kinder te doen es veurleze. Die vaan miech gónge zelde zonder e verhäölke nao bèd. Es juf op ’n basissjaol geneet iech ’t mieste es iech mèt mien kleuters kin goon zitte mèt e book. Mèt roej wengskes, duimke in de moond en groete ouge zuuste ze opgoon in ’t verhaol.

Netuurlek mote die verhäölkes passe bij d’n tied vaan ’t jaor. Mèt Sinterklaos is genóg käös oet touwpasseleke beuk, wat Keersemes en Paose betröf ’t zelfde. Meh Vastelaovend? Dao is gein ech veurleesbook veur gesjreve, en zeker gei Mestreechs. Dat is e gemis. En daorum höb iech beslote um ’t zelf te goon sjrieve. Es mama vaan drei kinder die mèt Vastelaovend vaan kleins aof aon woorte mètgesleip, en es juf, höb iech ’n sjatkis aon herinneringe en ervaringe um e book euver vol te sjrieve.

“Vastelaovendsvrundsjes” is geïllustreerd door Jeannine Brouns-Damen. Zie is ’n begaafde kunsteneres die de sjoenste werke maak in

alderlei stijle. Jeannine voolt perfek aon wie de illustraties móste weure. Häör teikeninge zien de prachtege keers op dees heerleke toert.

‘t Beukske nump uuch mèt in d’n aonluip nao Vastelaovend en netuurlek oeteindelek nao dit groet fies zelf.

De hoofpersoene, Mila en Nol, koume oet e gezin boe Carneval behuurlek get te zègke heet. Same mèt hun mama en papa en klein zusterke Lieke deit d’n twierling aon bijnao alles mèt wat in de stad Mestreech te make heet mèt Vastelaovend.

Neet allein in ’t gezin meh ouch op sjaol weurt dao väöl aondach aon gesjoonke. Mila en Nol en hun vrundsjes en vrundinnekes liere vaan juf Anneke wat Vastelaovend is, wat de Tempeleers allemaol doen, euver alles roontelum d’n Hoegen Hoeglöstegheid en nog väöl mie.

En tot d’n twierling aof en touw ins lekker deit boe ze zelf zin in höbbe, maak ’t beukske veur jong kinder dèks hilarisch … en herkinbaar. Ouch veur groete lui trouwens …

Iech wins uuch hiel väöl (veur-)leesplezeer en hoop tot dit beukske maag bijdrage aon ’t hoeghawwe vaan euze Vastelaovend.

 

Titel:

Vastelaovendsvrundsjes

Auteur: Vivianne Rijnders

Illustratrice: Jeannine Brouns-Damen

ISBN: 978-94-91561-72-7

Prijs: 12,11

 

Te koup bij Selexyz Dominicanen.

Wèlt geer mier wete euver ‘t book of de auteur, num daan kontak op met Uitgeverij TIC, 043-3262414 of kiek op www.uitgeverijtic.nl