Keemeleers en vastelaovend in Wiek 2022

 Vastelaovendsvereineging De Keemeleers maak ziech zörg. Netuurlek euver de koumende Vastelaovend, meh miejer nog euver de gezoondheid vaan us allemaol. Vastelaovendsvierder of neet, de Boonte Störm kin neet oettrèkke es 't coronavirus zoe hefteg roond geit es tot 't deit!

 

Veer es vereineging hope tot alle maotregele die gelle (en mesjiens nog goon gelle) helpe um dat ambetant virus de kop in te drökke en wel zoe wied tot veer in 2022 'ne awwerwèts gezèllege Mestreechter Vastelaovend kinne viere, same mèt uuch en met eus zöstervereineginge in Mestreech en daoboete.

 

Daorum zien veer bezeg mèt de ranzjatie vaan al eus activiteite die hure bij euze Keemelriekse Vastelaovend. Dink daobij aon 't oetrope vaan euze 73ste Vors (6 fibberwarie '22), de seniorematinee (13 fibberwarie '22), 't Vorstebal veur gans Wiek (19 fibberwarie '22) en netuurlek de Wieker Paraad veur de hermeniekes (20 fibberwarie '22).

 

Meh..........veer kieke um us heen en lègke us oere te luustere naor wat ziech aofspäölt op de weeg nao dee Vastelaovend touw. Zoewie al gezag, de gezoondheid vaan uuch en vaan us is 't allerbelangriekste in de koumende weke en mesjiens wel maonde. Dat zouw kinne beteikene tot veer activiteite mote goon bepèrke of mesjiens wel helemaol neet kinne oetvoere.

 

Dat zouw ouch beteikene tot Mestreech en Wiek veur 't twiede jaor achtrein geine Vastelaovend kin en maag goon viere en tot veer es Keemeleers us pekske in de kas en in de kis mote laote!

 

Es dat zoe zouw zien, daan zalle veer, zjus wie veureg jaor, toch vaan us laote hure met euze vergölde pin veur die lui die 't helste te lije höbbe oonder 't virus en de lock-down. Veer zalle us ingetoge bezeuke in 't kader vaan de sjariteit ouch daan laote doorgoon. En mesjiens kinne veer wel digitaol vaan us laote hure met 'n activiteit die ziech dao veur lient.

 

Vastelaovend moot e fies zien veur groet en klein, en veur us allemaol, en dat fies mote veer same en in gooj gezoondheid kinne viere es ’t ouch mer evekes meugelek is. Meh wel binne de sjraom en mèt empathie veur al die lui die door corona geraak zien, in 't hospitaol ligke of thoes aon 't revalidere zien.

 

Jao, veer make us zörg en veer twiefele, meh veer hawwe pin en hope tot veer uuch in fibberwarie 2022 allemaol mage zien op 't pleinsje veur de Poshoorn es veer euze 73ste Vors oetrope. Want es veer us zien, dan beteikent dat tot veer 't virus klein höbbe gekrege met z'n alle en tot veer Vastelaovend kinne viere zoe wie veer dat vaan pa en ma met de paplepel ingesjöt höbbe gekrege.

 

Veer laote wie daan ouch vaan us hure en tot deen tied...........blief gezoond en haw pin!