Nao e paar jaor vaan aofwezegheid zien veer obbenuits touwgetrooje tot de Samewèrkende Mestreechter Vastelaovendvereineginge (SMV).

Veer zien lid geweest vaan 't SMV sinds de opriechting vaan dit samewerkingsverbaand. 'N aontal jaor geleie höbbe veer beslote um oet 't SMV te stappe. Veer höbbe dat gedoon um us te beraoje op de touwkoms vaan us vereineging, us activiteite lokaal, regionaal en euregionaal, en op 't fies vaan de vastelaovend es zoedaneg. Op gezètte tije is 't veurnaom um pas op de plaots te make en mèt 't oug op de touwkoms vaan de vereineging nao te deenke euver de te volge (carnavals)rót op weeg nao de touwkoms. Dit heet ouch te make met de verjongingsslaag die veer gelökkeg kinne make.

Oondertösse zien veer zoe weet tot 't dudelek is welke riechting veer oet wèlle goon. Met es oetgaankspunt tot de oorsprong en de ziel vaan de Keemeleers in de Mestreechter Vastelaovend - mie in 't bezunder in de Wieker Vastelaovend - ligk, wèlle veer de 'carnaval viere'. Veur us beteikent dat same viere mèt de vereineginge in de wieke vaan Mestreech (de SMV-vereineginge mer ouch vereineginge die neet zien aongeslote), mer zoonder euze kontakte mèt vereineginge boete Mestreech (Limburg, Belsj en Duitsland), die veer in de veurgaonde jaore höbbe opgebouwd, oet 't oug te verlere.

De Vastelaovend is aon verandering oonderheveg. De wijs boe op 't gevierd weurt is neet mie 'tzèlfde es 'n aontal jaor geleie. Ouch de Mestreechse carnaval veranderd en um die veranderring mèt gestalte te geve höbbe veer beslote um weer trök te kiere in de sjoet van 't SMV. Carnaval in de wieke vaan Mestreech maag neet verlore goon, daorum is 't fies te veurnoum en dao wèlle veer gere aon mètwèrke.