Hölp gevraog i.v.m. gestole medaajes

Bèste vastelaovendsvrun,

 

Aofgeloupe jaor is 'ne inbraak gewees in de ruimte boe veer es Keemeleers eus historisch arsjief bewaore. 'n Aontal zake zien gestole, boe oonder eus verzameling Keemeleersmedaajes die euze aajd-Vors en aajd-Prizzedent Jos Magermans zaoleger mèt hiel väöl meujte en inzat bijein gekrege. Dees verzameling bestoond oet medaajes vaanaof 1948 tot en mèt 2016. Dao zaote hiel bezunder stökke tösse, boe ouch de persoeneleke hoesordes vaan eus Vorste en hiel väöl pinne.

 

't Zal veur ederein dudelek zien tot veer dit versjrikkelek vinde en tot veer d'r vaan alles aon doen en gedoon höbbe um te achterhaole wee d'n deef is gewees dee us dat geflik heet. Meh tot op d'n daag vaan vendaog wete veer neet wee 't gedoon heet en boe us medaajes gebleve zien.

 

Veer wèlle netuurlek dees verzameling weet euvernuits goon opbouwe en wie dit veurval bekint woort bij Arno Hameleers vaan Carnavalsvereiniging de Mineurs het heer spontaan aongebooje um (es erkind verzamelaar vaan vastelaovendsmedaajes) us dao-aon mèt te goon helpe. Veer zien Arno dao noe al zier erkintelek veur en veer zien devaan euvertuig tot veer mèt zien hölp eus verzameling weer kompleet kinne kriege.

 

Es geer dit lees zouw iech ouch uuch wèlle vraoge: höb geer mesjiens op zolder nog örgens in 'n stöbberege sjeundoes (aw) medaajes vaan de Keemeleers ligke? Es geer us daomèt wèlt en kint helpe, daan zouwe veer uuch zier erkintelek zien. Geer kint daoveur kontak opnumme mèt ueze Prizzedent Ed Moenen op z'n mobiel tèllefoonnómmer 06-23864092. Geer kint ouch mèt Arno Hameleers kontak opnumme op z'n mobiel nómmer 06-51775407.

 

En moch d'n deef nao 't leze vaan dit beriech toch spiet höbbe vaan zien actie: lègk de tuut met medaajes mer veur de deur aon de St. Maartenslaon 29, dui hiel hel op de deurbel en ren gaw eweg. Daan wete veer nog neet wee 't gedoon heet, meh höbbe veer wel ues spölle trök!

 

Ed Moenen

Prizzedent VV de Keemeleers