In 2021, in ’t biezundere Corona-jaor, geit de Loede Pin nao ‘ne gróp vaan lui die ziech verdeenstelek höbbe gemaak veur de lui vaan St.-Maartenspoort, naomelek ’t buurtnetwerk ‘Us Sint-Maartenspoort’. Dit buurtnetwerk woort opgeriech in 2018. Vol enthousiasme góng ’t netwerk aon de geng. Dat is nog neet zoe sumpel, want Sint-Maartenspoort besteit oet ’n bevólking vaan alderlei plumaasj en alderlei leeftije. ’t Waor dus hiel belangriek um get te vinde wat de lui in de wiek mèt elkaar góng verbinde. Want verboondenheid en liegdrempelegheid zien de kernwierde vaan ’t buurtnetwerk.

't Kloppend hart in dit ganse verhaol is de buurttuin, in de Gebroeders Hermansstraot. In deze tuin weure alderlei activiteite georganiseerd. Mèt Struine in de Tuine kriege muzikaol talente de kans um ziech te prizzentere aon ’t volk. Ouch weurt eine kier per maond ’n wandeling georganiseerd, boemèt de lui ziech beter kinne liere kinne en ouch speulenderwijs get aon de conditie kinne doen, veur de Vastelaovend of veur aander zakes. Veur dat wandele hoof me neet getraind te zien in loupe, meh wel in lache.

Jaorleks kin me ouch groete kunswerke en kleine kitsj koupe en verkoupe op de rommelmerret. ’t Buurtnetwèrk zörg deveur tot de lui ouch op dee rommelmerret kinne laote zien wee ze zien. Datzelfde is ouch te zègke veur de Buredaag en de jaorlekse Paosactiviteit. De herdinking vaan ’t Vergissingsbombardemint is cultureel gezeen vaan groete weerde. ’t Maag noe al dudelek zien tot ’t netwerk besteit oet lui mèt doezend han en e groet hart. Biezunder is tot ’t netwerk versjèllende instanties en vereineginge hölp en liet mètdinke bij de activiteite. Vaan studentevereineging Koko, boevaan ze de ruimte mage gebruke en boemèt ze gooj contacte oonderhawwe, tot aon Mondriaan, en vaan CNME, die mèt greun vingers zörge veur de buurttuin tot aon ’t Kènniscentrum vaan Mestreech, allemaol drage ze e steinsje bij um de verboondenheid in de wiek te vergrute. Dat is sjiek en dat is sjoen.

’n In ’t oug springend initiatief vaan ’t netwerk is de sofa op de Sint-Maartenslaon. ’t Projek ‘Social Sofa’ is bedoeld um lui op informeel wijs mèt elkaar in contak te laote koume. De fèlgekleurde baank woort gemaak door o.a. de BSO vaan de wiek, Mondriaan en aander belangstèllende. ’t Netwerk zèt ziech eder week op die baank um mèt de lui te praote, en dao weurt väölvöldeg gebruuk vaan gemaak.

’t Netwerk heet in Corona-tied hoop en steun bij de lui wèlle bringe. Door keerskaarte, umtot e keertsje altied mie zeet daan e kedoke. Door Haw-pin-plentsjes te bringe, um menneg woenkamer e bitteke op te fleure. En door leechskes te plaotse op ’t Sterreplein en in de umgeving.

Veer zien es Vastelaovendsvereineging de Keemeleers daan ouch biezunder gruuts tot veer de Loede Pin mage oetreike aan Buurtnetwerk Us Sint-Maartenspoort, en veer hope tot zie, ouch nao corona-tied, nog väöl gooj dinger veur de buurt mage doen. Zie stoon in eder geval te popele.