Blauw Sjuut trök in Wiek

 Hiel väöl jaor geleie kaom de Blauw Sjuut, 't vlaggesjeep vaan de Limburgse (Euregionale) Vastelaovend, aankere in Mestreech in wat toen nog de stadsbrouwerij de Ridder waor. De bemanning woort oontvaange mèt e ridderlek pèlske en touwgesproke mèt stiechteleke wäörd. En es ze einmaol veurzeen waore vaan 'ne einvoudege meh hiel veujzaome maoltied begaove zie z'ch weer oonderweeg op hun rót door de Vastelaovend.

 

Aon dat alles kaom in 2001 'n ind wie de Ridder besloot -of liever wie Heineken besloot- um de deure vaan de brouwerij te slete. De Keemeleers moste dus op zeuk noar 'n nui locatie boe de Sjuut kós aonlègke. Via de brouwerij vaan Bosch aon de Wieker Grachstraot koume veer oetindelek terech aon d'n euverkant vaan de Maos in de Groete Societeit en d'Eglantier. Veer en de Sjuut woorte dao mèt ope erm oontvaange en höbbe dao hiel väöl jaor mage genete vaan e heerlek gleeske beer, e geweldeg wandelend bufèt in 'n grandioos entourage. 

 

Vaanaof dit jaor jannewarie is me de exploitatie vaan de Groete Societeit aanders goon invölle boedoor de oontvangst vaan de Blauw Sjuut in 't gedrang kaom. Veer zien dus - oonder daankzègking aon de Societeit veur de gooj zörg vaan al die jaore- goon oetkieke nao weer 'n aander aankerplaots. 

 

En me zeet wel 'ns: l'histoire ce repète" en laot dat noe gebäöre op euze zeuktoch. Sjus op 't "moment suprème" -es veer daan toch in 't Frans bezig zien- kraog 't gebouw vaan de aw Ridde brouwerij nui inwoeners. Charles van Gogh (Mise en Place) en beersommelier Tom de Lepper zaoge hunne kans sjoen en betrókke 'n aontal ruimtes vaan dat markant gebouw aon d'n over vaan "madame la Meuse". 'n Nui (micro) brouwerij, e preuflokaal, 'ne winkel veur speciaol bere, e magnefiek terras "et voila", Wiek (en Mestreech) is weer 'n prachtige brouwerij en horecagelegenheid rieker! En de Keemeleers en de Blauw Sjuut höbbe weer hun aankerplaots op historische grond trök. 

 

Want wie de "Stadsbrouwerij de Maastrichter Maltezer" dit aofgeloupe jaor zien deure ope leet goon waore veer es de Kemiele debij um mèt Charles en Tom rond de taofel te goon zitte um 't verhaol vaan de Blauw Sjuut en de historie mèt de Ridder te vertèlle. Binne vief menute waor 't geregeld en kraoge veer de mie es oetbundege oetnudeging um vaanaof dit jaor de Blauw Sjuut weer aon te laote lègke op de Oeverwal. De historie kump daomèt weer trök op de plaots boe 't allemaol begós is mèt daank aon Brasserie, Brouwerij en Beerwinkel "De Maastrichter Maltezer". 

 

En euver historie gesproke: de Maltezer orde besjermde in d'n tied vaan de kruustochte de pelgrims die op weeg ginge naor 't Heilig Land. 't Kin daan ouch neet aanders tot de vastelaovendspelgrims vaan de Blauw Sjuut, einmaol veurzeen vaan e veers gebrouwe glaas Maltezer en gevöld mèt genóg wortelerats en boerekuul mèt spek en weurs oonder diezelfde besjerming vol fiducie hunne weeg door 't Vastelaovendsland vaanoet Mestreech-Oos kinne vervolge!