De Vors

 

Euze Vors Yves LXXI woort gebore op 9 oktober vaan ’t Vorstelek jaor 1981, thoes aon  de Mockstraot in Sjaan, wat toen al bij Mestreech huurde. ’t Waor ‘ne sjoenen daag boe-op de vastelaovend al in de loch zaot. Es zoon vaan Medea van Kessel en Joos Frissen zaog heer ’t levensleech. Anderhalf jaor later kaom dao zie breurke Guy bij. In Sjaan is heer opgegreujd; dao heet heer zien ierste batteraoverij oetgehaold; dao is heer ouch nao sjaol gegaange. Iers nao de Basissjaol Sjaan, en later nao ’t toenmaolege Jeanne d’Arc College aon de Meuleweeg in Hier. In zienen sjaoltied waor euze Hoeglöstegheid sportief en ‘ne helle wèrker. Heer heet verdeenstelek gezwomme bij Kimbria; in ‘t Sportfondsebad, zègk mer, ’t awwe Zwumbad Hier. Daoneve heet heer doezende dessèrkes gemaak es bijbäönsje in de Perroen op ‘t Vriethof.  In deen tied oontdèkde heer tot water veur mie es zwumme gebruuk kós weure, naomelek es groondstof veur e lekker pèlske. Dat feitsje oontstaok in häöm ‘n  passie veur gezèllegheid, lekker ete en drinke. En dat brach häöm nao Lummel, boe heer in 2000 begós aon de Hotèlvaksjaol.

Gei culinair geheim bleef in deen tied veur häöm verstoompeld. Es oonderdeil vaan zien studie aon de Hoege Hotèlsjaol
 
is euze Hoeglöstegheid ‘n haaf jaor nao Dublin gewees, boe heer väöl heet gelierd euver zie vak, meh veural ouch de daog heet getèld tot heer weer trök kós nao Mestreech. Heer besefde jummers al gaw tot ’n iewelange traditie vaan werm beer zoonder sjoem, neet in eine kier door ‘ne Mestreechse jong gerippereerd kós weure. Zien volgende staasj waor daan ouch gewoen op de Stationsstraot, in Wiek, bij Designhotel la Bergère.

Nao zien studie heet euze Vors door ‘t Heuvelland gezworve es kastelein en bedrijfsleier bij versjèllende horecageleigenhede.
  Ach jaor geleie kaom heer oet bij ’t MUMC+, ‘t hospitaol. Dao woort heer verantwoordelek veur de logistiek roontalum ’t ete veur alle patiënte. Dao heet heer de lach en de traon dèkser daan oets zien passere. De lèste 3 jaor hèlt heer ziech bezeg met versjèllende facilitaire projecte es projekleier. Daoneve is heer lid vaan de ondernummingsraod, mèt es aondachgebied financieje, strategie en verjónging. In ziene vrije tied is heer lid vaan de Jong Management Kring Zuid-Limburg.

 

In 2005 lierde heer bij ‘t veurneumde hotèl  zien Elvier kinne. Heer woende toen op de Wilhelminasingel en zie in de Rechstraot. ‘s Donderdags waor de Poshoorn vaste prik veur ’t prèl Wieks koppel en dat bleef zoe, ouch toen ‘t koppel same góng woene op de Wyckergrachtstraot bove de ANWB. Elvier woort op 26 mei 1983 gebore in ‘t hospitaol vaan Sint-Annadal es dochter vaan Bèr en Marjo Kleijnen- van ‘t Hullenaar. Zie woende in Wyckerpoort en góng in Wiek nao de basissjoal. Allewijl is Elvier global category manager ICT bij de inkoupaofdeiling vaan de Keuninklike DSM en daoneve, in häöre vrije tied,  habsjaar vaan de Dames Juniorkamer vaan Mestreech. In 2012 trouwde zie, en verhuisde ‘t koppel naor Sjaan, boe in 2016 hunne zoon mèt de vorsteleke naom Camile woort gebore, en anderhalf jaor later hun dochter Olivia ’t gezinneke completeerde.

 

Euver de jaore heet euze Vors ‘t talent veur regele en ritsele ingezat veur Mestreech en de Mestreechter Vastelaovend in ‘t biezunder. Heer is jaore börgermètwerker gewees veur “die vaan d’n aandere kant van de brögk” en is lid geweest van activiteitevereineging de Trèkkers. Door zien recente studie aon de Universiteit vaan Mestreech heet heer zien vereinigingsactiviteite mèt pijn in ‘t hart op ‘n liech vlemke mote zètte. Tot die zwoer beslissing ‘n gooj käös is gewees, bliek oet ‘t magnefieke resultaat. Aofgelaope jaor heet heer ziene MBA cum laude behaold.

 

De Vastelaovend heet altied ‘n speciaol plaots in ‘t hart gehad vaan euze Vors. Es kleine clojn voont heer de Boonte Störm altied ‘t sjiekste. Later had heer väöl bekieks es prima ballerina mèt ei bein op ‘t bufèt.

 

Euze Vors woent same mèt zien Elvier, Camile en Olivia in ’t vorstelek pelies, gelege aon de Sikkertaris Waberstraot 11, in Sjaan en steit bij de börgerleke stand ingesjreve es:

 

Yves Petrus Marie Frissen

 

 en zal euver ’t Keemelriek goon regere oonder de vorsteleke naome

 

Vors Yves LXXI

 

*VINOSOFIUS *PROCESSOLOGICUS *SALTATOR *AQUAVICTORIS

 

 

 

Gedissideerd en gecóntrasigneerd te Mestreech-Oos en veurgeleze in de boeteloch in ’t bijzien vaan ’t volk vaan Wiek en Mestreech-Oos op 02 fibberwarie, d’n derde zoondag veur de vastelaovend, vaan ’t jaor 183 kier 11 plus zeve!

 


De Kanselarijraod

 

Wino van den Bosch * Ed Moenen * Richard Darding * Egidius Cratsborn